Қызылорда облысында кәсіпкерлер палатасы жанынан "Тәлімгерлік мектебі" жобасы бастау алды

2025 жылғы 04 Сәуір

- Қызылорда облысы

374 просмотров

2-3 сәуір аралығында Қызылорда облысы кәсіпкерлер палатасының ұйымдастыруымен Жұмысшы мамандықтар жылы аясында «Тәлімгерлік мектебінің» оқу курсы өтті.

Оқытуға техникалық және кәсіптік білім беру ұйымдарымен тығыз байланыс орната отырып, кадр даярлаумен айналысатын дуалды оқытуға қатысушы кәсіпорындардың, мекемелердің отыздан астам өкілі қатысты.

Жобаның мультипликатор-тренері "Атамекен" ҚР ҰКП Адами капиталды дамыту департаменті директорының орынбасары Шонаева Ләззат Жаббарқызы және эксперті Региль Инна Михайловна. Оқыту барысында Л. Шонаева қатысушылармен дуальды оқытудың ұйымдастырушылық-құқықтық тетіктері мен міндеттері, жұмыс орнында оқытудың педагогикалық негіздері, оқыту технологиясы, әдістемелік тәсілдер мен құралдар, жұмыс орнында оқытудың құрылымы мен жоспарлануы, өндірістік оқыту жоспарын әзірлеу, мотивация, жас психологиясы, өнімді коммуникация технологияларының негіздері туралы ақпаратпен бөлісті.

Екі күндік оқытуға қатысушылар сабақтың өздері үшін өте пайдалы болғанын және осындай аз уақытта көптеген жаңашылдықтарды білуге септігін тигізгенін айтуда. Солардың бірі "АК СЕРВИС KZ" ЖШС басшысы Әбунасыр Мансұрұлы Қаржауов.

«Кәсіпкерлер палатасы ұйымдастырған бұл оқытудың шын мәнінде маңызы зор, әсіресе мен практиканы өткізу кезінде тәжірибе жетекшілері мен тәлімгерлеріне жүктелетін үлкен жауапкершілікті атап өткім келеді. Бұл оқыту тәлімгерлер мен студенттер үшін практика жүргізу кезінде қажетті барлық ақпаратты алуға мүмкіндік берді. Осы ретте, мен тәлімгерлік мектебінің ұйымдастырушыларына алғыс білдіргім келеді» деді Әбунасыр Қаржауов.

Шара барысында өңірлік кәсіпкерлер палатасы директорының орынбасары Рахымбек Зейнуллин барша қатысушыға оқудан өткендігі жөніндегі "Атамекен" ҚР ҰКП сертификатын табыстап, жұмыстарына сәттілік тіледі.