Павлодар облысында күзгі дала жұмыстарына арзандатылған дизельдік отын жеткізуші операторлары анықталды.
Павлодар облысында өңірдегі ауылшаруашылық тауар өндірушілері үшін арзандатылған дизель отынын сату операторын және жанар-жағармай бағасын белгілеу механизмін анықтау мақсатында жұмыс тобының отырысы өтті.
Ашық дауыс беру арқылы «ТК Парнас» ЖШС, «LF-TRADE» ЖШС, «Рымжан Трейд» ЖШС және «Leading Kuan Construction» ЖШС күзгі дала жұмыстарына шаруаларға арзандатылған дизель отынын сату операторлары болып анықталды.
Операторлық қызметтерді ескергендегі арзан дизель отынын сату бағасы, «LF-TRADE» ЖШС – 228 000 теңге, «Leading Kuan Construction» ЖШС – 227 500, «Рымжан Трейд» ЖШС – 227 500, «ТК Парнас» ЖШС – 227 000 теңге болып белгіленді.
Астық жинауға барлығы 23 мың тонна дизель отыны бөлінді, бұл бір жыл бұрынғыдан 2 мың тоннаға артық.
Шілде айында дизель отынының тоннасының бағасы 222 мың теңгені құрап отыр.
«Операторлар жеткізушімен келісім-шарт жасасқаннан кейін 10 жұмыс күні ішінде әр айға бөлінген дизельдік отынның барлық көлеміне төлем жасауы керек», - дейді Павлодар облысы Кәсіпкерлер палатасының директоры Серік Сәдуақасов.
Аудандар шаруа қожалықтарының дизель отынын алуды бекітілген кесте бойынша ұйымдастырады.
Күзгі дала жұмыстарына бөлінген жанар-жағармай көлемін алу мерзімі 15 -ші қазанға дейін.
Егер шаруалар жанар-жағармайды дер кезінде пайдаланбаса, операторлар таңдалмаған жанар-жағармайдың қалған бөлігін еркін нарықта сата алады.
Жұмыс тобының шешімімен дизельдік отынмен қамтамасыз ету операторлары ауыл шаруашылығы басқармасына күн сайын, сағат 17.30-ға дейін дизельдік отынның шаруа қожалықтарына сатылуы туралы есепті және басқа да қажетті ақпаратты ұсынуы қажет.
Қазақстан Ауыл шаруашылығы министрлігінің Павлодар мұнай-химия зауытынан отын жеткізу кестесін және жұмыс тобы отырысының хаттамасының мерзімін бұзған жағдайда комиссия дизельдік отынмен қамтамасыз ететін жаңа операторды анықтауға құқылы.
Пікір қалдыру:
Пікірлер: