Павлодарлық экологиялық және әлеуметтік жауапты кәсіпкерлер «Адал Азамат» атағына үміткер бола алады
Қазақстанның «Атамекен» Ұлттық кәсіпкерлер палатасы «Адал Азамат» атағын беру үшін өтінім қабылдаудың басталғанын жариялады.
Байқаудың негізгі мақсаты – қазақстандық кәсіпкерлер арасында бизнесті жүргізудің адал қағидаттарын, әлеуметтік жауапкершілікті, ашықтықты, экологиялық белсенділікті, қайырымдылықты және сыбайлас жемқорлыққа қарсы ұстанымды ынталандыру және насихаттау. Қатысуға кемінде үш жыл жұмыс істеп келе жатқан микро-, шағын және орта бизнес субъектілері жіберіледі.
Байқау қатысушылары республикалық «Таза Қазақстан» акциясына қатысу тәжірибесіне ие болуы, экологиялық мәселелерді шешуге бағытталған, оның ішінде таза технологияларды қолдану, тұрақты өндірістік процестерді қалыптастыру, зиянды шығарындыларды азайту, инновациялық шешімдерді пайдалану және басқа да жобаларды енгізуі және жүзеге асыруы тиіс.
«Адал Азамат» атағына үміткерлер табиғи апаттардың (су тасқыны, өрт және басқа төтенше жағдайлар) зардаптарын жоюға белсенді әлеуметтік ұстаныммен қатысуы, қайырымдылық және әлеуметтік бастамаларда, қоғамдық және экологиялық іс-шараларда, сондай-ақ қоршаған ортаны қорғауға бағытталған өзге де акцияларда тәжірибесі болуы керек.
Мұндай мәртебеге үміткер павлодарлық кәсіпкерлердің салық, әлеуметтік және өзге де міндетті төлемдер бойынша берешегі болмауы, еңбек даулары мен жанжалдары, заңнаманы және іскерлік этика нормаларын бұзу фактілері болмауы тиіс. Сондай-ақ олардың қоғамда және іскерлік ортада оң беделі болуы қажет.
Өтінімдер 1 қазанға дейін https://altynsapa.kz/ ресми сайтында онлайн қабылданады. Жеңімпаздарды марапаттау рәсімі 31 желтоқсаннан кешіктірілмей салтанатты түрде өткізіледі.
«Адал Азамат» байқауы – Павлодар облысы мен бүкіл елдің кәсіпкерлері үшін тұрақты даму, адалдық және әлеуметтік жауапкершілік құндылықтарына адалдығын көрсетуге, сондай-ақ қоғамдық мойындауға және қолдауға ие болуға мүмкіндік.
Пікір қалдыру:
Пікірлер: